හෙට දවසේ අප දෙදෙනා අද වාගෙම හමුවිය යුතුවේ...

 ගීයක අරුත - 6

හෙට දවසේ අප දෙදෙනා

අද වාගෙම හමුවිය යුතුවේ

අද දවසේ මවෙත ගෙනා

මිහිර හෙටත් ගෙන ආ යුතු වේ

කිසි වෙනසක් නැති එකම දෙයක් ඇත

එය මා හද රැඳි ආදරයයි

මගෙ ජීවිතයම නෞකාවක් නම්

එය ඔබ පැද යන සාගරයයි

හෙට දවසේ....

අද සුපිපෙන මල හෙට නොපිපේවී

ලෝකය දිවයයි වෙනස් වෙලා

එලෙස වෙනස්‍වන ලොවෙහි අළුත්වන්

ආදරයම මම ඉදිමි බලා

මේ ගීතය නොයෙක් විදියට අර්ථ කථනය වෙලා තියන ගීයක්. මට මේ ගැන ලියන්න කියපු කෙනාගෙන් මම ඇහුවා මට දඬුවම් කරන්නද මේ ගැන ලියන්න කිව්වෙ කියලා. එහෙම නෑ කියලා නම් කිව්වා.

මේ ගැන මීට කලිනුත් මගෙන් අහලා මේ ගීතය ගැන හෙව්වා. අපි අහලා පුරුදු ගීතයක්. මා සොයාගත් අර්ථ දෙකකුත් මා විසින් පිරිනමන අර්ථයත් මෙහි ලියන්නයි අදහස. අර්ථ එන්නෙ මෙහෙමයි.

1. මත්පැන් ගැන

2. ගීතය ගුවන්විදුලියේදී අඩක් ලියැවී පසුව ඉතුරු අඩ ලියැවීම.

3. ප්‍රේමය

අද දවසේ මවෙත ගෙනා මිහිර හෙටත් ගෙන ආ යුතු වේ කියන්නෙ ඒ මත්පැන් ලෝලියෙක්ගෙන් වැඩක් ගන්න නම් මත්පැන් දුන්නම පුළුවන් කියන එයාගෙ හිත වැඩ කරන විදිය.

දෙවෙනි අර්ථය මෙතැන තියනවා - https://geeyakawathagotha.fandom.com/.../%E0%B7%84%E0%B7...

එතන කියවෙන්නෙ ප්‍රේමකීර්ති ද අල්විස් රචකයා ගුවන් විදුලි සංස්ථාවට පැමිණි වෙලාවක ප්‍රියා සූරියසේන ගායක තුමන් විසින් ඔහුට කියා මුල් පද කිහිපය කුරුටු ගා ගෙන ඊළඟ දවසේ ඒ කොලේම ඉතුරු ටික ලියා දුන් බවයි.

මා ලියන්නේ තුන්වැනි අර්ථය. ඒ කියන්නෙ ප්‍රේමය. මේ ගීතයේ ප්‍රේමයත් කාර්යාලයීය ප්‍රේමය කියලා හිතන්න පුළුවන්. ඒ කියන්නෙ ඒ දෙන්නා අතර යම් බැඳීමක් ඇතිවෙලා. ඔහුට ඇය දැකීම මිහිරක්. ඒ මිහිර පමණක් නෙමෙයි, ඇය ගේන බත් පත වුවත් මිහිරි නිසා ඔහු ඇයට කවා, බත් පත හිස් කරනවා. ඇය බඩගින්නෙ ඉඳන් හරි ඔහු කනවා නම් ඒ ඇයගෙ මිහිර. ආදරයේ හැටි තමා ඒ.

හෙට දවසේ අප දෙදෙනා

අද වාගෙම හමුවිය යුතුවේ

අද දවසේ මවෙත ගෙනා

මිහිර හෙටත් ගෙන ආ යුතු වේ

මේ අදහස්ම වෛශ්‍යාවක් හමු වූ පුරුෂයෙක්ට හිතෙන්න පුළුවන්. සමහර වෛශ්‍යාවන් ලිංගික එකතු වීමකට පමණක් හමුවන්නේ නැහැ. පිරිමින්ගෙ තියන මානසික ආතතීන් සමනය කරන අම්මත් ඈ. ඇය තනියම ඉන්න නිසා බත් පිහලා ඔහුට දීලා ඔහුව සනසන එක අලිංගිකව ඇය විසින් කරනවා වෙන්න ඇති. නමුත් ඒ දෙන්නා එක වහලක් යට නෑ. මේ කොයි ආකාරයෙන් ගත්තත් ඊළඟට කියවෙන කොටස තුළ තියෙන්නෙ නොවෙනස් ආදරය.

කිසි වෙනසක් නැති එකම දෙයක් ඇත

එය මා හද රැඳි ආදරයයි

මගෙ ජීවිතයම නෞකාවක් නම්

එය ඔබ පැද යන සාගරයයි

ගීතමය තාලයෙන් සරළව කියවෙන්නෙ මා හදේ රැඳි ආදරය තමයි නොවෙනස් වන එකම දේ. ඔහු මේක ඇයට වඩාත් තහවුරුව කියන්නෙ ඒ එකම දේ නිත්‍යයි කියමින්. ඔහු ඊළඟට කියනවා නැවක් පවතින්න නම් සයුරක් ඔ්න. ඔහු නැවක්. ඇය තමයි සයුර. ඒ දෙක අවියෝජනීයයි.

අද සුපිපෙන මල හෙට නොපිපේවී

ලෝකය දිවයයි වෙනස් වෙලා

එලෙස වෙනස්‍වන ලොවෙහි අළුත්වන්

ආදරයම මම ඉදිමි බලා

නැවතත් කියන්නෙ ඔහුගෙම නොවෙනස්වන ආදරය ගැන. ලෝකෙ අනිත්‍යය පෙන්වන සුලබ උපමාව තමයි මල්. අද පිපෙන මල හෙට පිපෙන්නෙ නෑ. ලෝකය වෙනස් වෙමින් දිවයෑම තමයි ලෝ දහම.

අළුත් ආදරය බලා මම ඉන්නවා. එහෙම නැත්නම් අළුත් ආදරයම මමයි. ඒ මම හැමදාම වගේ මෙතනම ඉන්නවා. බලාගෙන.

එහෙනම් මෙතනින් මම නවතින්නම්.

ගීතය අහන්න මෙතැනින් - https://www.youtube.com/watch?v=IO1XztCpb1Q&feature=share...

දෑරංගල කුසලඤාණ